Жаңаарқа ауданының мектептерінің бірінде Ақселеу Сейдімбек атындағы мұражай ашылды

Жаңаарқа кентінің жалпы білім беретін мектебінде Қазақстанның еңбек сіңірген қайраткері Ақселеу Сейдімбектің мұражайы ашылды. Онда қоғам қайраткері, белгілі этнограф, өнертанушы, журналист және публицистің еңбектері, өмірбаяндық деректері, жеке заттары жинақталған.

– Өткен жылы мектебімізге жерлесіміз Ақселеу Сейдімбектің есімі берілді. Карантин мен қашықтықтан оқытудың салдарынан біз оның мұражайын бірден аша алмадық. Есесіне мұны Тәуелсіздіктің мерейтойлық жылында жүзеге асыра алдық. Мұражайда Ақселеу Сейдімбектің өмірі туралы стендтер, ол туралы мақалалар, оның еңбектері, оқушылардың ғылыми жұмыстары мен фотосуреттері ұсынылған, – деді мектептің тарих пәнінің мұғалімі Жадыра Рысбекова.

 

 

 

Мұражайда жазушының қалта пышағы және оның кейбір жеке заттары бар.

Болашақта мектеп оқушылары Ақселеу Сейдімбектің өмірі мен еңбек жолын мұражайда жинақталған құжаттар мен ол туралы мақалаларға сүйене отырып зерттей алады.

Ақселеу Сейдімбек – Жаңаарқа ауданының тумасы. Көп жылдар бойы Ortalyq Qazaqstan газеттерінде еңбек етті. 1976 жылдан республикалық “Социалистік Қазақстан” қазіргі “Егемен Қазақстан” газетінде әдебиет және өнер бөлімінің меңгерушісі болып жұмыс істеді.

 

 

 

Сондай-ақ, ол “Зерде” журналында, “Әлем” альманахында, Мұхтар Әуезов атындағы Әдебиет және өнер институтында басшылық қызметтер атқарды, Ыбырай Алтынсарин атындағы білім беру институтының директоры, Қазақ білім академиясының тұңғыш Президенті, Президенттік мәдени орталық директорының орынбасары болды. Л. Н. Гумилев атындағы Еуразия ұлттық университетінде дәріс берді.

 

 

2003 жылы оған Қазақстанның еңбек сіңірген қайраткері атағы берілді. 2004 жылы ол Мемлекеттік сыйлықтың лауреаты болды.

 

Жомарт Шаймұрат