ЖОЛДАР

Жолдар – бізді шақыратын мұратқа,

Жолдар – бізді апаратын қыратқа.

Жолдар – бізді таныс қылған жатпенен,

Жолдар – бізді табыстырған бақпенен.

Жолдар – бізді жіберетін алысқа,

Жолдар – бізді көтеретін ғарышқа.

Жолдар – бізді асықтырған биікке,

Жолдар – бізді жолықтырған күйікке.

Жолдар – бізді жат сынына суарған,

Жолдар – бізді даңқ шыңына шығарған.

Жолдар – бізді жетелейтін үмітке,

Жолдар – бізді итеретін күдікке.

Жолдар – бізді таныстырған ізгі өлең,

Жолдар – бізді табыстырған қызбенен.

Жолдар – бізді қорғайтын да өмірде,

Жолдар – бізді айдайтын да өлімге…