Жарылыстан қаза тапқандар саны 17-ге жетті

Жамбыл облысындағы жарылыстан зардап шеккен тағы бір өрт сөндіруші қайтыс болды, деп хабарлады еліміздің Төтенше жағдайлар министрлігінің баспасөз қызметі.

«Жамбыл облысындағы жарылыстан зардап шеккен 1993 жылы туған өрт сөндіруші қайтыс болды. Ол бұған дейін Нұр-Сұлтан қаласындағы Травматология және ортопедия ғылыми-зерттеу институының ауруханасына жеткізіліп, сол жерде ем алып жатқан болатын.
Осылайша Жамбыл облысындағы жарылыс салдарынан қаза тапқандар саны он жеті адамға жетті. Оның ішінде 10 азаматтық қорғау органдарының қызметкері, Қорғаныс министрлігінің 6 әскери қызметкері және бір әскери прокурор. Жоғалған тағы бір адам іздестірілуде», делінген министрліктің ресми хабарламасында.
Қосымша айта кетсек, санавиациямен шұғыл түрде Елордаға жеткізілген бұл азамат Тараз қалалық №1 Мамандандырылған өрт сөндіру бөлімінің өрт сөндіруші-құтқарушысы болып қызмет еткен Жәнібек Турманов еді. Оның артында жары мен екі баласы қалды.
Бүгінде тепсе темір үзетін жігіттерден, талай жанның өмірін ажалдан арашалап қалған кәсіби өрт сөндіруші-құтқарушы әріптестерінен айрылып қара жамылып отырған облыстағы өрт сөндіру қызметіне бұл хабар өте ауыр тиді. Әріптестерінің айтуынша, Жәнібек осы саладағы халыққа қалтқысыз қызмет еткен 6 жылдық еңбек жолында 28 мәрте марапатқа ие болған екен.

 

Облыстық төтенше жағдайлар департаменті жариялаған ресми ақпаратта Жәнібектің үздік өрт сөндіруші болғаны айтылады.
«Турманов Жәнібек өз ісінің шебері, нағыз от жауынгері, тамаша жігіт, асыл жар әрі екі баланың аяулы әкесі еді.
Жәнібек сол күні кезекші қарауыл құрамында болған. Олар оқиға орнына, яғни Байзақ ауданына алғашқылардың бірі болып келді. Өзінің қызметес досы, әріптесі Дидар Умирзаковпен бірге өрт автоцестернасынан лафеттік оқпанды қолданып, өртті сөндірмек болған сәтте алғашқы жарылыс орын алған. Дидардың айтуынша, олар Жәнібекпен бірге жарылыс дүмпуінен көлік үстінен жерге құлаған. Одан әрі әріптестерін іздей бастады. Д.Умирзаковтын айтуынша, ол Жәнібек екеуі тұла бойларын зорға алып жүргендеріне қарамастан етқызумен жарылыс аумағынан алыстауға тырысқан. Олар жолай жерден өзге біреулердің каскаларын тауып алып, бастарына киеді. Бірақ үсті-үстіне қайталанған жарылыстардан каскалары қайта-қайта ұшып кеткен. Содан кейін олар жараланған әріптестерін кездестіріп және окопта көмек күткен.

 

 

Жәнібек Турманов сол түні Тараз қаласындағы ауруханалардың біріне жеткізілді. Осыдан кейін, бірнеше күннен соң ол арнайы бортпен Нұр-Сұлтан қаласының Травмоталогия және ортопедия ғылыми-зерттеу институтына жеткізілді. Біз бәріміз оның тез ортамызға оралуын күткен едік. Бірақ… өкінішке орай, 2021 жылдың 11 қыркүйегінде таңғы 4-те ол мына жарық дүниемен қош айтысып кете барды», делінген департамент хабарламасында.

 

Әріптестері Жәнібек өзінің жарқын күлкісімен мәңгілік есте қалатынын жазыпты. «Біз оны «Джони» деп еркелуші едік. Әрқайсысымызға ол керемет дос бола білді. Әріптестерінің айтуынша ол әрқашан өрт сөндіру ісінде бірінші болып, жұмысты жауапкершілікпен орындаған. Оның алдағы болашаққа жоспарлары көп болған деседі. Погондағы жұлдыздарын көбейткісі келді. Ол тіпті жақын аралықта офицер де болар еді. Өйткені, Жәнібек биыл ғана Санкт-Петербург қаласының Мемлекеттік өртке қарсы қызмет университетін бітіген болатын.
Ол өзінің азаматтық қорғау органдарындағы қызметін 2013 жылғы қаңтарда Солтүстік Қазақстан облысының өртке қарсы қызмет гарнизонында бастады. Содан кейін 2015 жылы Жамбыл облысына ауыстырылды. Осы 6 жылдық мінсіз қызметі үшін ол 28 марапатқа ие болған. Иә…Тағдырға не шара! Қош бол, егемен елдің жаны жайсаң азаматы. Біз сені жүректерден өшірмек емеспіз», деп аяқталған ТЖД хабарламасы.

 

Жамбылдықтар да жаралыстан қаза тапқан батырларын ешқашан ұмытпайды.
Жасұлан СЕЙІЛХАН,
Жамбыл облысы