Түрік мәдениеті мен мұрасы қоры Астанада өткен Әлемдік және дәстүрлі дін көшбасшыларының VIII съезіне қатысуда

Бүгін – қыркүйектің 19-ында Астанада Әлемдік және дәстүрлі дін көшбасшыларының VIII съезі өз жұмысын жалғастырады. Съездің жұмысына Түрік мәдениеті мен мұрасы қорының президенті Ақтоты Райымқұлова да қатысуда.

Ислам дүниесінің білім, ғылым және мәдениет ұйымының (ICESCO) Бас директоры доктор Салим бин Мұхаммед Әл-Маликтің съезге қатысуы аясында түрік мәдениеті мен мұрасы қорының бастамасы және қолдауымен сапар бағдарламасын кеңейту жоспарланған.

«Әдебиет және өнер» порталының хабарлауынша, сапар бағдарламасы аясында ICESCO Бас директоры доктор Салим бин Мұхаммед Әл-Маликтің Шымкент қаласына және Түркістан облысына да баратыны айтылды. Мұнда негізгі назар мәдени мұра мәселелеріне және халықаралық ынтымақтастықты кеңейтуге бағытталатыны атап өтіледі.

Сапар барысында өңір басшыларымен ресми кездесулер өткізу, сондай-ақ мәдени және тарихи мұра ескерткіштерін аралау жоспарланған. Негізгі бағыттардың қатарында ICESCO-мен ынтымақтастықты тереңдету, Қазақстанның мәдени мұрасын қорғау мен насихаттау жөніндегі бастамаларды дамыту, сондай-ақ Шымкент пен Түркістан облысының ескерткіштерін Ислам әлемінің мәдени мұра тізіміне енгізу мәселесі бар.

Түрік мәдениеті мен мұрасы қоры атап көрсеткендей, сапардың өңірлік бөлігін ұйымдастыру Қазақстанның бай мәдени мұрасын таныту және ICESCO-мен ынтымақтастықты нығайту бағытында маңызды қадам болып табылады.

Қазақстан ескерткіштерінің Ислам әлемінің мәдени мұра тізіміне енгізілуі елдің халықаралық имиджін нығайтуға, мәдени дипломатия мен туризмді дамытуға жаңа мүмкіндіктер ашатын болады.

Әдебиет және өнер