Суармалы су мәселесі шешілетін болды

Сейсенбі, 12 сәуірде Қазақстан Республикасы Парламенті Мәжілісінің Экология және табиғатты пайдалану мәселелері жөніндегі комитетінің отырысы өтті. Жиынды Комитет төрағасы Александр Александрович Милютин ашты.

Отырысқа депутаттар – Экология және табиғи ресурстар комитетінің мүшелері мен Экология, геология және табиғи ресурстар, Энергетика, Қаржы министрліктерінің басшылығы қатысты, сонымен қатар 50 қатысушы «онлайн режимде» жұмыс істеді. Отырыста 2022 жылға арналған Республикалық бюджетті нақтылау туралы заң жобасы қаралды.

Бюджет жобасында Қазақстанда суармалы сумен жабдықтау жүйелерін қаржыландыру қарастырылған.

Жамбыл облысындағы ұзақ жылдар бойы шешімі табылмай отырған суармалы су мәселесі шешілді десе болады. Жобада Жамбыл облысындағы сумен жабдықтау жүйелерін, гидротехника құрылыстарын салуға және реконструкциялауға, атап өтсек: Сарысу ауданындағы Шабақты өзеніндегі Ынталы су қоймасын, Меркі ауданындағы Аспара, Жуалы ауданындағы Теріс-Ащыбұлақ, Қордай ауданындағы Қарақоңыз су қоймаларын және Ырғайты, Қалғұты, Ақмола жаңа су қоймаларын салуға және реконструкциялауға қаржы қаражаты көзделгенін аса қуанышпен атап өткім келеді.

Су қоймаларын салу Қырғыз Республикасына тәуелділікті азайтып қана қоймай, Қордай, Меркі, Байзақ, Жамбыл және Талас аудандарында ауыл шаруашылығы дақылдары өндірісінің өсуіне де оң әсерін тигізеді.

Нәтижесінде жақсы өнім, жаңа жұмыс орындары және жамбылдықтарды өз азық-түлігімен қамтамасыз етуге болады деп үміттенеміз.

Жиын барысында әртүрлі мәселелер талқыланып, 40-тан астам сауалға жауаптар алынды.

Отырысты қорытындылаған комитет төрағасы Александр Милютин депутаттардың барлық түйткілді мәселелерді бірлесіп талқылауға, оларды шешуге өз көзқарастарын ұсынуға дайын екенін атап өтті.

ҚР Мәжіліс депутаты Ильяс Буларовтың фб. Парақшасынан