ІШКІ СҰЛУЛЫҚ ПЕН СЫРТҚЫ СҰЛУЛЫҚ

Баяғы өткен заманда бір патша базардан екі құл сатып алыпты. Құлдарының бірі сиықсыз, тістері шірік әрі аузы сасық екен, ал екіншісі болса келбетті, маржандай тістері бар әрі аузынан хош иіс шыққан жағымды адам екен. Патша келбетті құлын сыйға бөлеп, моншаға жібереді. Аузы сасыған екінші құлды қасына шақырып:
– Сені ұнатып-ақ едім, бірақ ана моншаға кеткен досың сен туралы көп жаман нәрселер айтты. Сен де қаласаң маған оның жаман тұстарын айтып бер, – дейді. Құл болса жолдасына шаң жуытпай, ол туралы еш жаман сөз айтпады. Патша қалай тырысса да, мақтаудан басқа ештеңе айттыра алмапты.
Екінші құлы моншадан қайтып келгенде, патша оны да сынамақ болып қасына шақыртты. Біраз мақтау сөз айтқан соң:
– Ана досың айтып берген жаман мінездерің болмаса, жап-жақсы жігітсің, – депті. Сөйтсе, әлгі ашуланып, жолдасы туралы қайдағы жоқты айтып, жамандай бастайды.
Патша біраз тыңдаған соң:
– Доғар сөзді, кімнің кім екенін енді білдім. Мен сені тексеру үшін айтқан едім. Оны осылайша тексергенімде, ол сен туралы тек жақсы сөздер айтты. Сен жамандаған жолдасыңның аузы сасыса, сенің ішің сасыған, шірік екенсің. Бар, сол жамандаған досыңның қол астында жұмыс істейтін боласың, – депті.
Адамның ішкі дүниесі, мінезі жаман болса, сұлу келбетінің құны көк тиын.
СҰЛУЛЫҚ ПЕН КӨРІКСІЗДІК
Бір күні Сұлулық пен Көріксіздік бір көлдің жағасында кездесіп:
– Суға түсейік, – деп, киімдерін шешіп суға түсіп жүзеді. Біраздан кейін Көріксіздік жағаға шығып, Сұлулықтың киімдерін киіп алады да, кетіп қалады. Сұлулық жағаға шыққан кезде өз киімін таппайды. Жалаңаш тұра беруге де ұялады. Көріксіздіктің киімін амалсыздан киеді.
Сол күннен бері, ерлер мен әйелдер ол екеуін шатастырып жүреді-мыс. Бірақ, кейбір адамдар Сұлулықты бұрыннан білгендіктен, оның үстіндегі киіміне қарамай-ақ оны таниды. Көріксіздікті де бұрыннан көргендер, оның әдемі көйлегіне алданбай, шынайы жүзін көре алады.