ШҚО-да жыл үздіктері марапатталды: Өскеменде «Jastarmen Birge» салтанатты рәсімі өтті

02.12.202502.12.2025 Елана

Өскемен қаласында өңірдің ең белсенді, еңбекқор және үлгілі жастары бас қосқан «Jastarmen Birge» атты салтанатты марапаттау рәсімі өтті. Шара «Жұмысшы мамандықтар жылы» аясында ұйымдастырылып, оған ірі өндіріс орындарының жас кәсіби мамандары, волонтерлер, жастар ұйымдарының жетекшілері, «Ассамблея жастары» қозғалысының өкілдері қатысты.

Алдымен жұмысшы жастардың «Maman Fest» фестивалінің жеңімпаздары анықталды.
Үздік үштік келесідей болды:

• III орын – «Қазақстан темір жолы» ҰК жас мамандар командасы (400 мың теңгелік сертификат);

• II орын – «Востокцветмет» ЖШС Артемьев өндірістік кешенінің командасы (600 мың теңге);

• I орын және фестивальдің Бас жүлдесі – «Өскемен ЖЭО» ЖШС жұмысшы жастары (1 миллион теңге).

Одан кейін Шығыс Қазақстан облысы әкімінің «Мемлекеттік жастар саясатын іске асыруға қосқан үлесі үшін» сыйлығы табысталды. Әр номинация жеңімпазына 500 мың теңгелік сертификат берілді.
Биылғы үздіктер:

• «Жыл көшбасшысы» – «Казцинк» ЖШС жастар кеңесінің төрайымы Жансая Жанболатова;

• «Үздік жас digital маман» – Бірынғай ситуациялық орталықтың қызметкері және бірнеше инновациялық жобалардың авторы Валерия Коцур;

• «Еңбек адамы» – «Ульбинск металлургия зауыты» АҚ-ның бериллий өндірісі бойынша ауысым шебері, 12 жыл еңбек өтілі бар Әділ Төлеуғазинов;

• «Жыл волонтері» – Абай атындағы Шығыс Қазақстан гуманитарлық колледжінің студенті Арна Арданбекқызы;

• «Жылдың жастар ұйымы» – биыл 50-ден астам шара өткізіп, 3000-нан астам жасты қамтыған «Ұлағат» жастар қоғамдық бірлестігі.

Салтанатты шарада облыс әкімі Нұрымбет Сақтағанов жастарды құттықтап, олардың өңірдің әлеуметтік-экономикалық дамуына қосып жатқан үлесін ерекше атап өтті. Әкімнің айтуынша, өңірде техникалық және кәсіби білімді қолдау, жас мамандардың әлеуетін арттыру, жастар бастамаларына жағдай жасау бағытындағы жұмыстар алда да жалғасады. Жастар мен мемлекеттік институттардың өзара ынтымақтастығы ШҚО-ның тұрақты қарқынмен дамуына негіз болатынын атап өтті.

Жиын соңында қатысушылар марапат олардың жаңа белестерді бағындыруға деген жігерін күшейте түсетінін айтты. Сондай-ақ іс-шара барысында жастар саясатын кеңінен ақпараттандыру, Президенттік кадр резервінен бастап, отандық БАҚ жобаларын қолдау, салалық журналистиканы дамыту, қайырымдылық пен волонтерлікті насихаттау – өңірдегі ақпараттық жұмыстың негізгі бағыттарының бірі екені де айтылды.

Тәттімбек Асханұлы

Халықаралық «Qazaqstan dauiri» газетінің

ШҚО бойынша меншікті тілшісі