МЕНІҢ АТАМ МАЙДАНГЕР
Қанқұйлы кезеңдерді қамтыған соғыстың отты жылдары талай боздақтардың жанын қиды. Бүгінде ұрпақтары соғысқа қатысқан аталарының ерліктерімен мақтанып, кеуделерін қуаныш кернейді. Ұлы Отан соғысына қатысқан майдангерлердің бірі — менің атам Смайлов Сәлім Әбдірасылұлы.
Атам 1923 жылы Оңтүстік Қазақстан облысы, Созақ ауданы, Құмкент ауылында дүниеге келген. Жалындап тұрған жастық шағында 1941 жылы соғыстың өрті тұтанып, майдан даласына аттанады.
Соғыста “Максимка” пулеметінің атқышы болып, Сталинград қаласын азат етуге атсалысып, ұрыс даласында ажалмен бетпе — бет келеді. Соғыста бір аяғынан айырылып, ауыр жараланып елге қайтады.
Елге оралған соң “Халық шаруашылығы” институтын бітіріп, 45 жыл бухгалтерлік қызметті абыройлы атқарып, зейнетке шығады. Ерлігі үшін бірнеше медальдармен марапатталды. Атам 1989 жылы бұл дүниемен қош айтысты.
Бүгінде атамның 10 ұл — қызынан немере шөберелер тарап, ұрпақтары үлгілі әулетке айналуда.
Марқұм атамның әкеме айтқан ақыл — кеңестері бүкіл әулетімізге сарқылмас азық болды. Мен майдангер атаммен мақтанамын.