Жасөспірімдердің құқықтық жауапкершілігі мен қауіпсіздігіне арналған кездесу өтті

Жасөспірімдердің құқықтық сауаттылығын арттыру, олардың заң алдындағы жауапкершілігі мен жеке қауіпсіздігіне қатысты өзекті мәселелер аудан орталығында өткен мазмұнды кездесуде жан-жақты талқыланды. Аталған маңызды басқосуға Жамбыл облысы Полиция департаменті бастығының орынбасары, полиция полковнигі Ораз Жолдасов арнайы жұмыс сапарымен келіп, аудан мектептерінің жоғары сынып оқушыларымен еркін форматта ашық пікір алмасты.

Сондай-ақ өскелең ұрпақ тәрбиесі мен құқық қорғау бағытындағы келелі жиынға аудан прокуроры Ілияс Тойшыбеков, аудандық полиция бөлімінің бастығы Мадияр Қуанышбеков және аудан әкімінің орынбасары Бақкелді Тұрсынбек қатысып, мәселенің қоғамдағы ерекше маңыздылығына тоқталды.

Кездесу барысында кәмелетке толмағандар арасындағы құқықбұзушылық пен қылмыстың алдын алу, қоғамдық тәртіп пен заң талаптарын қатаң сақтау және жасөспірімдердің өмірі мен денсаулығының қауіпсіздігін толыққанды қамтамасыз ету мәселелері кеңінен қозғалды. Жиын қатысушылары оқушыларға заң бұзушылықтың салдары мен оның болашаққа тигізер кері әсері туралы нақты өмірлік мысалдар арқылы түсіндірді.

Әсіресе, бүгінгі таңда жастар ортасында өзекті болып отырған мектептегі буллинг пен кибербуллинг, интернет алаяқтықтың құрбаны болудан сақтану, зиянды әдеттерден аулақ болу және әлеуметтік желілердегі түрлі ақпараттық қауіп-қатерлердің алдын алу тетіктеріне ерекше назар аударылды.

Жиын соңында Полиция департаменті бастығының орынбасары Ораз Жолдасов жоғары сынып оқушыларына құқықтық жауапкершілік, жеке бас қауіпсіздігін сақтау және заң нормаларын құрметтеу жөнінде жан-жақты түсіндірме жұмыстарын жүргізді. Сонымен қатар жастарды өмірлік кез келген күрделі жағдайда сабырлы әрі дұрыс шешім қабылдауға, заңсыз әрекеттерден бойын аулақ ұстауға және өз іс-әрекеттеріне үлкен жауапкершілікпен қарауға шақырды.