«ПАРЛАМЕНТ СӨЗІ» СЫЙЛЫҒЫНЫҢ ЛАУРЕАТЫ – БІЗДІҢ СӘУЛЕ МЕШІТБАЙҚЫЗЫ – ЕЛАНАСЫ

Иә, Журналистерге арналған “Парламент сөзі” сыйлығының жеңімпаздары аталды. 2016 жылдан бастап жыл сайын өткізілетін сыйлық қорытындысын шығару елімізде орын алған коронавирус індетіне байланысты биылғы жылы бірқатар өзгерістерге ұшырады.

Соның бірі біздің газетіміздің бас директоры Сәуле Мешітбайқызы екендігі біздің ұжымның мерейін тасытты. Біздіңше бұл орынды берілген марапат. Өткен жылғы газетіміздің барлық нөмірінде дерлік тәтеміздің материалдары жарияланды. Және қандай мақалалар десеңші! Биыл да Сәуле тәтейіміз қамшыны басты. Күйіп тұрған өзекті мәселелер, ұлттық мүдде, қатпар-қатпар күрделі де тың, арда сан алуан тақырыптар. Жеріне жеткізіп, әрбірін шырқыратып, дүбірлетіп, дүңкілдетіп жазды. Сайтымызда үзбей беріп отырдық, оқырмандар асыға күтіп отырады.Бәйге құтты болсын, құрметті Еланасы- Сәуле апа…! Өзіңіз қашанда марапат алғанда бұл менің емес ұжымымның сендердің еңбектерің деп ұжымды алдыға қоятыңыздың өзі үлкен тәрбие өнеге жалғасын таба берсін..! Марапат құтты болсы әріптестер жазар көбейсін! Шығармашылдық зор табыс тілейміз

 

«Парламент сөзі» сыйлығының жеңімпаздары анықталды

 

Мәжіліс журналистерге арналған “Парламент сөзі” сыйлығының қорытындысын жариялап, арнаулы аталымдар бойынша жеңімпаздарын анықтады, деп хабарлайды zakon.kz.

Құрамында Мәжіліс депутаттары, көрнекті қоғам қайраткерлері, партия өкілдері кіретін Комиссия шешімі бойынша осы жылы жеңімпаздар жеті аталым бойынша сайысқа түсті.

Мәжіліс Төрағасы Нұрлан Нығматулин «Парламент сөзі», сыйлығының жеңімпаздарына, сондай-ақ, барша бұқаралық ақпарат өкілдеріне кәсіби мерекеге орай құттықтау лебізін жеткізді.

Осы ретте, Нұрлан Нығматулин журналистер мен депутаттық корпустың бірлескен нәтижелі жұмысына баса назар аудара келіп, заң шығару жұмысына белсене қатысқан тілшілер қауымының еңбегіне тоқталды.

«Парламенттік журналистиканы дамытуға қосқан үлесі үшін» аталымы бойынша «Qazaqstan dauiri» бас директоры Сәуле Мешітбаева және “Караван” газетінің бас редакторы Игорь Шахновичке берілсе, «Үздік телевизиялық сюжет үшін» номинациясын  «Хабар» телеарнасының тілшісі Индира Жылқайдарова және «Еуразия» бірінші арнасының тілшісі Светлана Пенькова жеңіп алды.

Ал, “Үздік баспа жарияланымы үшін” номинациясын “Егемен Қазақстан” газетінің тілшісі Темір Құсаинов пен “Литер” газетінің ұжымы иеленді.

“Үздік интернет және радио материалы” номинациясын “Abai.kz” ақпараттық порталы және Серік Сабеков (“Kazinform”) иеленді.

“Парламент сөзі” сыйлығының “Арнайы репортаж” номинациясын “Қазақ радиолары” және “Хабар 24” телеарнасының корреспонденті Марк Брюшко  жеңіп алды.

“Үздік бейне – сурет материалы үшін” номинациясын “Nur Media” фототілшісі Советбек Мағзумов және “Хабар” телеарнасының бас операторы  Еділ Ермекбаев  иеленді.

Сондай-ақ,  биыл  әлеуметтік желідегі үздектер анықталды. Олар “Әлеуметтік желідегі үздік материал үшін” номинациясын алғаш рет журналист-блогер  Өркен Кенжебек  және YEDILOV ONLINE Telegram-каналының авторы Ербол Еділов иеленді.

Сонымен қатар, Мәжіліс Төрағасы Нұрлан Нығматулиннің бастамасымен биылғы жылы  “Парламент сөзі”  арнайы сыйлығы номинациясы жуық арада ғана дүниеден өткен белгілі қазақстандық журналист  Бейсен Құранбекке  берілді.

Мәжіліс Төрағасынының айтуынша, Бейсен Құранбектей отандық телевизияның дамуына зор үлес қосқан, білімді, тәжірибелі азаматтың еңбегі халықтың қошеметіне лайық.

Айта кету керек, 2016 жылдан бастап жыл сайын өткізілетін сыйлық қорытындысын шығару елімізде орын алған коронавирус індетіне байланысты биылғы жылы бірқатар өзгерістерге ұшырады.

Мәжіліс “Парламент сөзі” сыйлығының иегерлерін Мәжіліс символикасы бейнеленген мүсіншелермен және арнайы дипломдармен марапаттауды Парламенттің күзгі сессиясында өткізеді деп жоспарлауда.