Отбасы институтын нығайту қажет

Мемлекет басшысы Қасым-Жомарт Тоқаев мұғалімдер мәртебесі, оқыту мәселесі жайлы өте орынды қозғады. Мұғалімдер мәртебесі туралы арнайы заң қабылдануын қабылданғанымен, іс жүзінде жүзеге асырылып жатқан жоқ. Мәртебеміз көтерілді деп мардымсыған мұғалімдердің, керісінше сол дәрежеге лайық немесе лайық еместігі өз деңгейінде сарапқа салынып жатпайды.

Ал, тәжірибелі, озық, үздік ұстаздардың мойнына артылған жүгі батпандай зілмауыр. Осы тепе-теңдікті қалыпқа келтірмейінше, білім саласындағы проблемалар өзінің өзектілігін жоймайды.

Сондай-ақ, жаңадан сайланған Мәжіліс депутаттары ең әуелі идеологияның ең жоғарғы діңі саналатын демографиялық саясатқа үлкен мән беруі тиіс. «Неке және отбасы» туралы Заңды түбегейлі қайта қарау қажет. Біздің мемлекетімізде азаматтық некеге қатаң тыйым салынбаса болмайды. Отбасындағы, қоғамда орын алған түрлі зорлық-зомбылықтар ата-ана мен баланың жауапкершілігінің жоқтығынан, әке, ана, отбасы институттарының рөлінің төмендігінен жұқпалы дерттей көбеюде.

Мәжілісмендер назар аударатын тағы бір мәселе – қоғамдағы тым ашықтыққа тосқауыл қою. Қоғам біздің ұлттық құндылықтарымызды түгел жалаңаштандырып алды десе де болады.

Сайлаушы ретінде менің ғана емес, бүкіл қоғам мүшелерінің тағы бір қалауы бар, ол – қылмыскерге ең ауыр жаза қолдану шарасын тағы бір пысықтаса екен деген тілек. Зайырлы мемлекет ретінде өлім жазасы бізде жоқ. Алайда, «Аюға намаз үйреткен – таяқ». Осыдан аз-ақ жыл бұрын бүкіл елді дүрліктірген сәтбаевтық педофильдің жантүршігерлік тірлігі қалай естен шықпақ? Кешегі өзінің өзегінен шыққан үш баласын өлтірген жауыз әкенің ісі тұрмыстағы, қоғамдағы зорлық-зомбылықтардың, зұлымдықтың барып тұрған ең сорақысы.

Дала академиясы ерекше дамыған дана қазақтың қазіргі ұрпағында отбасы, аналар, әкелер институттарының нашар жұмыс істеуі осындай жағдайлардың орын алуына әкеліп соғып отыр.

Сондықтан, не нәрсенің де ашық ақпарат көздерімен талғамсыз таратыла беруіне ел болып, жұрт болып шұғыл арада тосқауыл қоюымыз керек!

Үміт БИТЕНОВА,
ақын, «Құрмет» орденінің иегері.