Еуро-2016: Ұлттық арна қазақ тілінде көрсетілім ұсынса…

Белгілі спорт журналисі Рауан Оқас өзінің Фейсбук парақшасына «Қазақстан» ұлттық арнасына ұсынысын жариялады. Жазбада:

Еуропа чемпионатына санаулы күн қалды. Бұйырса, футбол додасын Қазақстан Ұлттық телеарнасынан көреміз. Төрт жыл бұрынғы Еурода, таза қазақ тілінде хабар таратуы тиіс арна, екі тілде сайрап еді. Бұл жолы тура солай бола ма деген алаңдаушылық бар. Өткенде, Головкин мен Исламның жекпе-жектерінен екі тілде хабар таратылды. Барлығын қайта соған əкеле жатыр. Рейтинг, жарнама, тағы басқа сылтаулар ғой. Екі жыл бұрын өткен Əлем чемпионаты да, орысша өтті. Шыны керек, қазір “Қазспортты” басқарып отырған Павел Цыбулин сияқты азаматтар қалайда екі тілде жүргізілудің амалын жасайды. Басшылықта отырған Нұржан Жалауқызы мен Қайнар Олжай мырзалар жол бермесе екен. Елбасының өзі «Ұлттық арна таза қазақ тілінде болсын»-деген. Жаңа құрылған министрліктің осыған мəн бергені абзал. Сондықтан, қазірден бастап, Ұлттық арнаның есіне сала берейін. Футболдан Еуропа біріншілігі таза қазақ тілінде жүргізілсін!,-делінген.

Әрине, қазақ тілі дегенде көңілі бөлек футбол жанкүйерлері қарап қалсын ба, мұндай ұсынысты «ә» дегеннен-ақ қолдай кетті. Ал, тек қана спорттық шаралар қос тілде беріліп жүрген ұлттық арна басшылығы Р.Оқастың ұсынысын жерде қалдырмайды деген сенімдеміз.  

«ЕлАна»