«БІР АТАНЫҢ БАЛАЛАРЫ ФУТБОЛ ОЙНАЙДЫ»

Бауыржан Момышұлы ауылындағы Орталық стадионда Қазақстан Республикасының Конституциясы күніне арналған шағын футболдан «БІР АТАНЫҢ БАЛАЛАРЫ ФУТБОЛ ОЙНАЙДЫ» атты жанұялық командалар арасындағы аудандық жарыс ұйымдастырылды.

Аталған жарыстың ашылу салтанатына шақырылған қонақтар мен аудан тұрғындары және жанұялық командалар қатысты. Жарыстың ашылу салтанатында Жуалы ауданы әкімдігінің дене шынықтыру және спорт бөлімінің басшысы Мақсұтбек Арзымбетов салтанатты түрде ашып, жарысқа қатысушыларға деген тілегін білдірді.
Бұл жарысқа Бауыржан Момышұлы ауылы мен ауылдық округтерден келген Шәкіровтер, Айдарбековтар, Дәуіт ата, Сейтаевтар, Ноқаевтар, Сейітбековтар, Құрышбаевтар, Үйкекбай ата сияқты бірнеше отбасыдан 100-ден аса атасы мен әкесі және балалары мен немерелері бар коман­далар келді.

8 команда 2 топқа бөлініп, әрбір топтан екі команда жартылай финалға жолдама алды. Финалда «Дәуіт ата» отбасы жеңіске жетіп, бас бәй­гені иеленді. Екінші орынды «Сейітбековтер» әулеті жеңсе, Үздік үштіктен «Шәкіровтер» командасы көрінді.
Бірнеше аталымда үздіктер анықталып, олардың бәріне сый­лықтар тапсырылды. Атап айт­қанда, отбасылық жарыста «Үздік шабуылшы» — «Сейітбековтер» командасының ойыншысы Мирас Оразбақ, «Үздік қорғаушы» – «Дәуіт ата» командасының мүшесі Эльдар Дәуітов, «Үздік қақ­пашы» – «Шәкіровтар» әулетінен Ринат Тасқынбаев, «Үздік ойыншы» – «Дәуіт ата» отба­сының мүшесі Мадияр Дәуітов лайық деп таныл­ды.
Буйыртса, алдағы уақытта осы жарысты дәстүрлі түрде ұйымдастырсақ деп отырмыз. Себебі, бұл – жай ғана жарыс емес, ол – жастардың тәр­биесіне орасан зор ықпал ете алатын біре­гей спорт додасы. Бұл – тәрбие құралы.